Батыс Қазақстан облысында жыл басынан бері 5030 бас іріқара, 788 бас ұсақ мал бруцеллезге шалдықты, деп хабарлайды ҚазАқпарат.
Облыс әкімдігінен мәлім еткеніндей, аталған санитарлықмал басы уақтылы союға тапсырылды.
Малды бағып-күткен кезде, сондай-ақ оның өнімдерін пайдаланған кезде бруцеллез адамға да жұғады.
Биылғы он бір айда 45 адамның осы індетпен ауырғаны тіркелді. Соның ішінде Ақжайық ауданында – 16, Бөрліде – 5, Бәйтеректе – 7, Жаңақала, Тасқала, Шыңғырлауда – 2-2-ден, Қаратөбеде – 1, Орал қаласында 8 адам сырқаттанды.
«Жыл басынан бері жануарлардың аса қауіпті жұқпалы ауруларының 13 ошағы (1 қарасан, 4 құтыру, 7 жұқпалы ринотрахеит, 1 брадзот) тіркелді. Ауру ошақтарында республикалық эпизоотияға қарсы жасақ қызметі арқылы тиісті вакцинациялау, дезинфекциялау жұмыстары атқарылды. Жыл сайын ветеринариялық іс-шаралар жоспарына сәйкес жануарлардың 12 аса қауіпті ауруына қарсы профилактикалық іс-шаралар жүргізіліп келеді», деп хабарлады ведомствода.
Еске сала кетейік, Батыс Қазақстанда ірі қара саны 790 мыңға жеткен.
Өзекті жаңалықтарды біздің сайтымыздан оқи отырып, Malbazar телеграм-арнамызда пікірлеріңізбен бөлісіңіздер