Ақтөбе облысы Шалқар ауданының аграрларына кадрлар қажет. Жергілікті халық аграрлық секторда жұмыс істегісі келмейді, басқа жұмыс түрлерін немесе мемлекет жәрдемақыларын артық көреді. Бұл туралы Кәсіпкерлер палатасының аудандық филиалында өткен кездесуде айтылды, деп хабарлайды ҚазАқпарат.
Кәсіпкер Бекет Құдайбергенов жылыжай кешенін салуды жоспарлап отырғанын, алайда кадрлар тапшылығы мәселесі бар екенін айтты. Биыл ол 1,2 млн теңге көлемінде мемлекеттік грантты жеңіп алып, ашық далада көкөніс өсірумен айналысты.
«Бәсекелестік жоқ. Бұл тауашалар ауылда еркін. Гранттың қаражаты жеткілікті болды, бірақ мен кадрлар туралы алаңдаймын. Менің бақылауларым аграрлық секторда жұмыс істегісі келетіндердің жоқ екенін көрсетеді. Ауыл тұрғындары үйде болуды, үй шаруашылығымен өмір сүруді және бүгінде көбейіп келе жатқан мемлекеттіәлеуметтік қолдау шараларын пайдалануды жөн көреді», — деді кәсіпкер.