Ақмолада 11 тауарлы сүт фермасы ашылады

2022 жылы Ақмола облысында жалпы құны 36,9 млрд теңге болатын 44 инвестициялық жобаны іске асыру жоспарланған. Өңірде 104 етті және 11 тауарлы сүт фермасы ашылады. Ол үшін етті бағыттағы 4,5 мың ірі қара мен сүтті бағыттағы 2,4 мың ірі қара мал сатып алынбақ, деп хабарлайды Мalbazar.kz «ҚазАқпарат»-қа сілтеме жасап.

Ақмола ауыл шаруашылығы дамыған өңірдің бірі. Мұндағы жалпы өнім көлемінің үлесі 10 пайызды құрайды. Былтыр мал шаруашылығы саласында өнім өндірісінің 11,6 пайызға өсуіне қол жеткізілді. Бұл республикадағы үздік көрсеткіш саналады. Өсім ет өндірісінің 25 пайызға, сүт өндірісінің 0,4 пайызға, сиыр басының 1,7 пайызға, қой мен ешкінің 1,9 пайызға, құстың 5 пайызға ұлғаюымен байланысты.

– Өңірде ет және сүт шаруашылығы қарқынды дамуда. Облыстың әр ауданында кезең-кезеңімен ет және сүт фермаларын ашу жұмыстары жалғасуда. 2021 жылы өңірде 6,4 мың басқа арналған 125 ет фермасы және 2,3 мың басқа арналған 19 тауарлы сүт фермасы ашылды. Импортты алмастыру аясында етті құс шаруашылығы да дамуда, – дейді облыстық ауыл шаруашылығы басқармасының басшысы Еркеш Әленов.

Артқа оралу Келесі жазба